Konkou istwa kout

Règ konkou a

Atik 1 : Konkou a ouvè pou tout elèv 8èm ane jiska NS4.​

Atik 2 : Tèm konkou a se « Istwa vil mwen an ».

Chak vil/vilaj gen yon nanm, yon istwa ki merite rakonte. Avèk tèm sa a, nou ankouraje w eksplore resi reyèl oubyen imajinè ki fè vibre kè vil ou a. Istwa kout a kapab enspire l de sa k te pase nan listwa, mit lokal, pèsonaj enpòtan, oubyen souvni familyal. Li kapab yon kreyasyon fiktif men ki anrasinen nan idantite vil ou a. Se petèt yon mistè, yon dram, oubyen yon bagay ki pase chak jou. Istwa w la dwe kaptire esans kote sa ki chè pou ou a.

N ap chèche istwa ki mete limyè sou richès kilti kreyòl la atravè vi nan vil/vilaj nou yo. Kite imajinasyon w gide w e transpòte lektè yo nan yon vwayaj atravè tan, tradisyon ak peyizaj vil/vilaj ou a. Nou p ap chèche tèks ki pale de pwoblèm sèlman, men pito, tèks ki vrèman konstriktif.

Konkou sa se yon opòtinite pou nou fè reviv istwa kominite nou yo, pou n konsève memwa yo e selebre divèsite yo.

Pran plim ou e pataje avèk nou yon istwa kout (nouvelle) k ap fè eko pou istwa vil/vilaj ou a.

Atik 3: Tèks yo dwe gen 3 a 5 paj. Pa plis ke 5 paj, pa piti ke 3 paj. Nou p ap pran tèks ki pa respekte kondisyon sa yo.

Atik 4: Chak tèks yo ap soumèt an fòma nimerik PDF.

-       Polis: Times New Roman

-       Tay 12

-       Entèliy: 1.5

Atik 5 : Tout tèks yo dwe voye sou WhatsApp nan nimewo sa a : 41 96 6365 ; oubyen sou adrès mail sa : kontaktenou@santrova.org

Atik 6 : Tout tèks yo dwe soumèt lendi 7 oktòb avan 4è PM pou pi ta. Nou p ap konsidere tèks ki soumèt anreta yo.

Atik 7 : Tèks yo dwe gen yon paj kouvèti ki gen enfòmasyon sa yo ladan l : non konplè, laj, klas, nimewo telefòn, nan ki vil ou sòti e nan ki lekòl e kisa w renmen fè nan tan lib ou.

Atik 8 : Tèks yo ap evalye selon kritè sa yo : orijinalite, kreyativite, kalite ekriti kreyòl la, pètinans li parapò ak tèm nan.​​